Litmyndir
Hafnarfirði 1953–1997
Sverrir Örn Valdimarsson (1923–2004) prentari stofnaði Litmyndir í Hafnarfirði árið 1953 ásamt Friðriki Jóelssyni (1922–2013) prentara. Þeir ráku prentsmiðjuna til ársins 1978, en þá slitu þeir samstarfinu, skiptu upp eignunum og Friðrik stofnaði Prentsmiðju Friðriks Jóelssonar en Sverrir rak Litmyndir áfram til 1997. Í dag rekur Valdimar Sverrisson (1951–) sonur hans fyrirtækið Litmyndir prentmiðlun að Lónsbraut 2 í Hafnarfirði.
![Skra_0042204](https://prentsogusetur.is/wp-content/uploads/2023/01/Skra_0042204.jpg)
Prentsmiðja St. Franciskussystra
Stykkishólmi 1952–2002
Prentsmiðja Kaþólsku kirkjunnar í Stykkishólmi var stundum kennd við nunnurnar í Hólminum. Nunnan sem helst stóð fyrir því að koma upp prentsmiðju í Stykkishólmi hét Renée og var frá Belgíu. Hún var af gamalli prentaraætt og þekkti því vel til í faginu og hafði unnið við það í heimahúsum. Vélarnar sem þær notuðu voru meðalstór Heidelbergpressa og Intertype-setningarvél, en auk þess höfðu þær minni prentvél, skurðarhníf, saumavél og fleira.
Prentsmiðja Kaþólsku kirkjunnar
Stykkishólmi 1952–2002
Árið 1952 kom þáverandi biskup Kaþólsku kirkjunnar á Íslandi, Jóhannes Gunnarsson (1897–1972), upp lítilli prentsmiðju við Klaustur St. Franciskussystra í Stykkishólmi. Hún var í húsnæðinu þar sem rafstöðin var áður, útbygging við austurhorn spítalans. Fyrsta prentvélin kom 1. nóvember þetta ár. Þá höfðu nýlega komið frá Belgíu, systir Rósa og systir Renée, sem báðar voru prentlærðar.
Allar vélar og tæki voru í eigu Kaþólska biskupsembættisins, en systurnar lögðu til húsnæðið. Í prentsmiðjunni var prentað allt efni fyrir Kaþólsku kirkjuna og Biskupsembættið, m.a.: Merki krossins, Rómversk-kaþólsk messusöngbók og bók um heilagan Frans frá Assisí. Systurnar prentuðu alls kyns smáverk, bæði fyrir fyrirtæki og einstaklinga. Þá prentuðu þær Frímerkjablaðið og jólafrímerki um tíu ára skeið, samtals um 20 merki. Prentsmiðjan var tekin niður árið 2002 og voru þá vélarnar seldar, m.a. keypti Prentsmiðjan Prentun eina vél en sumt fór á safn.
Prentsmiðjan Rún
Reykjavík 1950–1960
Prentsmiðjan Rún hét áður Prentverk Guðmundar Kristjánssonar og var Guðmundur eigandi hennar. Hann lést hins vegar þegar prentsmiðjan var nýstofnuð eða 26. desember 1946. Ásgeir Guðmundsson (1893–1975) prentari tók þá við stjórn hennar um hríð og var prentsmiðjan rekin áfram undir nafni Guðmundar. Nafni prentsmiðjunnar var síðan breytt árið 1950 í Prentsmiðjan Rún. Forstöðumenn hennar voru m.a. þessir prentarar: Sigurður Gunnarsson (1923–1980) til 1952. Björn Jónsson (1895–1967) tók þá við í nokkur ár en 1959–1960 var Björgvin Ólafsson (1916–2006) forstöðumaður í Rún. Þá var prentsmiðjan seld Arnbirni Kristinssyni (1925–2017) prentara í Setbergi.
Prentfell
Reykjavík 1947-1965
Prentsmiðjan Prentfell var stofnuð upp úr eignaskiptum í Hrappseyjarprenti árið 1947 en þar var Vilhjálmur Svan Jóhannsson (1907–1990) forstjóri.
Annar hlutinn hét Snorraprent og var sú prentsmiðja rekin til 1949, en hlutur Vilhjálms Svans hét Prentfell og rak hann þá prentsmiðju til 1965 að hún var seld til Prentsmiðju Jóns Helgasonar. Allar þessar prentsmiðjur prentuðu eitthvað af bókum Íslendingasagnaútgáfunnar en þar var Vilhjálmur Svan hluthafi.
Prentfell var til húsa á heimili Vilhjálms á Hörpugötu 13–14 í Skerjafirði í Reykjavík.
Ingólfsprent
Reykjavík 1946–
Ingólfsprent var stofnað 1946 af bræðrunum og prenturunum Magnúsi Stefánssyni (1906–1975) og Ólafi Stefánssyni (1902–1990) og ráku þeir prentsmiðjuna til 1968 að Ingólfur Ólafsson (1924–1974) prentari keypti hana og rak til dánardægurs 1974. Tengdasonur hans, Steingrímur Leifsson (1943–2015) hélt síðan starfseminni áfram í nokkur ár, en þá keyptu þeir prentararnir Jón Áskels Óskarsson (1944–) og Jóhann Larsen (1945–) prentsmiðjuna og ráku hana undir nafni Ingólfsprents til 1995. Starfsemin var þá aukin og Hagprent keypt og fyrirtækið rekið í nokkurn tíma undir nafninu Hagprent-Ingólfsprent. Því var svo skipt upp á milli þeirra félaga og nú er Ingólfsprent rekið sem smáprentsmiðja á nafni Jóns Áskels Óskarssonar. Eftir að ríkið hætti prentsmiðjurekstri bauð Ríkiskaup út alla prentun fyrir opinberar stofnanir. Árið 1996 gerðu þeir t.d. samninga við fimm prentsmiðjur og var Hagprent-Ingólfsprent ein af þeim. Í framhaldi af því prentuðu þeir ýmis rit og bækur fyrir Námsgagnastofnun.
Snorraprent
Reykjavík 1947–1949
Hrappseyjarprentsmiðja var stofnuð 1945 í Reykjavík eftir að Vilhjálmur Svan kom með vélar sínar aftur frá Akranesi. Prentsmiðjunni var síðan skipt í tvennt árið 1947. Hét önnur prentsmiðjan Snorraprent og voru stofnendurnir þeir Gunnar Steindórsson (1918–1966) og Grímur Gíslason (1913–1979) hjá Íslendingasagnaútgáfunni og Guðmundur Á. Jóhannsson prentari.
Grímur var framkvæmdastjóri þeirrar prentsmiðju. Hin prentsmiðjan var skírð Prentfell og fékk Vilhjálmur Svan hana í sinn hlut og rak til ársins 1965, að hann seldi hana til Prentsmiðju Jóns Helgasonar.
Vilhjálmur Svan var einnig hluthafi í Íslendingasagnaútgáfunni sem stofnuð var á þessum árum og prentsmiðjur sem hann rak prentuðu eitthvað af verkum hennar.
Þegar Snorraprent hætti fóru sumar vélar prentsmiðjunnar til Vestmannaeyja en aðrar í Prentverk Guðmundar Kristjánssonar. Í Snorraprenti voru líka prentaðir Annálar og nafnaskrá en þeir voru 7. bindið í bókaflokknum Byskupa Sögur I–III og Sturlunga Saga I–III og komu þær allar út 1948, en voru endurprentaðar margoft síðar. Þetta var framhald á 12 binda útgáfu þeirra félaga á Íslendingasögunum I–XII og Nafnaskrá XIII. Þá var prentað í Snorraprenti Ævintýrið um svikaprinsinn, austurlenzk saga og teikningar eftir Halldór Pétursson í þýðingu Sesselju Guðmundsdóttur.
Prentsmiðja Hafnarfjarðar
Hafnarfirði 1946–2007
Guðmundur Ragnar Jósefsson (1921–1962) prentari stofnaði nýja prentsmiðju í Hafnarfirði, ásamt bókbandi, í nóvember árið 1946. Prentsmiðjan var til húsa í Suðurgötu 18 í Hafnarfirði og var Guðmundur framkvæmdastjóri til dánardægurs 1962. Eftirlifandi kona hans, Steinunn Guðmundsdóttir (1919–2005), tók þá við rekstri fyrirtækisins og seinna dætur þeirra, Ingibjörg Guðmundsdóttir (1946–) bókbindari og Guðrún Guðmundsdóttir (1948–) bókagerðarmaður.
Prentsmiðja Hafnarfjarðar var síðan seld til Prentmets árið 2007.
Prentverk Akraness
Akranesi 1946–2000
Árið 1946 endurreisti Ólafur B. Björnsson (1895–1959) prentsmiðjuna á Akranesi og festi kaup á húsinu Heiðarbraut 20 fyrir starfsemina. Einar Einarsson (1919–2003) prentari var ráðinn prentsmiðjustjóri til 1964, en þá tók Bragi Þórðarson (1933–) prentari við, en hann var einn af eigendum prentsmiðjunnar.
Flutt var í nýtt húsnæði að Heiðargerði 22 um 1970. Bragi var prentsmiðjustjóri til ársins 1982. Hann var einnig eigandi Hörpuútgáfunnar og rak hana frá árinu 1960 til 2007. Prentverk Akraness var selt Prentmet árið 2000 og var nafni prentsmiðjunnar breytt í Prentmet Vesturlands árið 2006 en prentsmiðjustjóri nú er Þórður Elíasson (1951–) prentsmiður.
Prentsmiðjan Leiftur
Reykjavík 1946–1978
Ólafur Bergmann Erlingsson (1898–1973) prentari stofnaði Prentsmiðjuna Leiftur snemma árs 1946, en hann rak prentmyndagerð með sama nafni frá 1937. Ólafur var mikilvirkur bókaútgefandi og gaf m.a. út margar af bókum Kristmanns Guðmundssonar og Ólafs Jóhanns Sigurðssonar. Gunnar Einarsson (1893–1975) prentari keypti Prentsmiðjuna Leiftur af Ólafi 1955 og rak hana til dánardægurs.
Gunnar var landskunnur maður og var fyrst kenndur við Ísafold, en þar var hann lengi prentsmiðjustjóri. Eftir að hann varð eigandi og prentsmiðjustjóri í Leiftri var hann kenndur við þá smiðju. Hann var formaður Bóksalafélags Íslands í aldarfjórðung.
Leiftur var víða í Reykjavík, fyrst í Hafnarstræti, sem prentmyndagerð, svo í Tryggvagötu, á Hverfisgötu 46 og Laugavegi 29, en flutti þá í Þingholtsstræti 27 á 1. hæð í hús Prentsmiðjunnar Hóla. Þá var Leiftur orðin prentsmiðja og var síðan flutt í Höfðatún 12 eftir að Gunnar Einarsson eignaðist Leiftur 1955.