Svanur Guðmundsson.
Kristjana Ó. Valgeirsdóttir.
Ágúst Ólafsson.
Svartlist
Hellu 1996–
Svanur Guðmundsson (1955–) prentari og kona hans Kristjana Ó. Valgeirsdóttir (1964–) stofnuðu prentsmiðjuna Svartlist á Hellu í október 1996. Þau ráku hana fyrst í þröngu leiguhúsnæði en árið 1999 keyptu þau húsið að Þrúðvangi 20 og bjuggu þar á efri hæðinni, en prentsmiðjunni var komið fyrir á þeirri neðri.
Þarna ráku þau hana til ársins 2006, en þá tók við prentsmiðjunni Ágúst Ólafsson (1953–2015) prentari sem rak hana til dd. 2015. Þá tók kona hans Jónína Grímsdóttir (1956–) við rekstri prentsmiðjunnar og hefur rekið hana síðan. Svartlist hefur gefið út auglýsingaritið Búkollu frá því prentsmiðjan var sett á stofn 1996 og er 23. árg. að byrja á þessu ári 2019. Prentsmiðjan hefur líka prentað á þessum árum héraðsritið Goðastein, auk margra annarra góðra prentverka.
Sverrir D. Hauksson.
G. Ben-Edda prentstofa
Kópavogi 1994–1997
Prentstofa G. Ben og Prentsmiðjan Edda sameinuðust 26. ágúst 1994. Samband íslenskra samvinnufélaga sem átti nær alla prentsmiðjuna Eddu, seldi hlut sinn og með sameiningunni varð til prentsmiðja sem fékk nafnið G. Ben-Edda prentstofa hf. Hluthafar voru 18 talsins, en starfsstöð fyrirtækisins var að Smiðjuvegi 3 í Kópavogi þar sem Prentsmiðjan Edda hafði verið til húsa áður.
Jón Steingrímsson var ráðinn framkvæmdastjóri en Sverrir D. Hauksson (1955–) prentsmiðjustjóri. Nokkrum mánuðum síðar eða í nóvember 1994 keypti svo Prentsmiðjan Oddi, G. Ben-Eddu prentstofu og var hún rekin áfram sem sérstakt fyrirtæki, en nafninu var breytt í Grafík árið 1997.
Jóhannes Ólafsson.
Steinprent
Ólafsvík 1993–
Prentsmiðjan Steinprent í Ólafsvík var stofnað í maí 1993 af Jóhannesi Ólafssyni (1965–) prentara. Hún er eina prentsmiðjan á Snæfellsnesi og leggur áherslu á að þjónusta íbúa Vesturlands. Prentsmiðjan var fyrst staðsett við Snoppuveg í Ólafsvík en árið 1998 var hún flutt að Sandholti 22 og hefur verið þar til húsa síðan. Jóhannes var við prentnám í Prentsmiðjunni Odda í Reykjavík og útskrifaðist frá Iðnskólanum þar 1988 og tók sveinspróf 1989. Starfaði síðan í Prentsmiðjunni Odda til 1993.
Magnús Guðjónsson.
Prentsmiðjan Tarsus
Reykjavík og Garðabæ 1993–2006
Forsaga þessarar prentsmiðju er að Magnús Guðjónsson (1935–) prentari hafði rekið prentsmiðjuna Fjarðarprent í Hafnarfirði í 30 ár eða frá árinu 1963 þegar hún fór í þrot.
Vinur hans Stefán Nikulás Ágústsson (1935–2012) hljóp þá undir bagga og stofnaði Tarsus í félagi við Magnús. Var prentsmiðjan fyrst til húsa uppi á Höfða í Reykjavík, en flutti seinna að Garðaflöt 16–18 í Garðabæ. Tarsus var rekin til ársins 2006, en þá var hún seld.
Þórleifur V. Friðriksson.
Ólafur Stolzenwald.
Sigurður Þorláksson.
GuðjónÓ
Reykjavík 1992–
Árið 1992 tóku nýir eigendur við Prentsmiðjunni GuðjónÓ hf og nefndu hana fyrst Hjá GuðjónÓ. Eigendurnir eru: Þórleifur V. Friðriksson (1948–), Ólafur Stolzenwald (1961–) og Sigurður Þorláksson (1942–). Í dag heitir hún GuðjónÓ — vistvæna prentsmiðjan og er til húsa að Þverholti 13. Prentsmiðja GuðjónÓ hf flutti í húsið í kringum 1978. Starfsemin hefur síðan eflst og blómstrað og eru starfsmenn hennar í dag orðnir 14 talsins. Vélakostur er hefðbundinn: Roland prentvél til bókaprentunar og fyrir stærri upplög. Heidelberg GTO og árið 2013 var tekin í notkun ný Xerox J75 Press stafræn prentvél. 2014 var keyptur stór plotter frá Canon sem tekur rúman meter í prentflöt og lengd eins og rúllan leyfir. Þá eru þeir með þrjá umslagamatara til að auka gæði og hraða í prentun umslaga. SM prentvélin sem er sú nýjasta í flota GuðjónÓ er notuð í gæðaprentun og getur lakkað með vatnslakki og þurrkað um leið. Auk þessa eru margskonar vélar fyrir frágang svo sem brotvél, skurðarhnífar og trukkvélar frá Heidelberg.
Fyrir utan alla almenna prentun hefur GuðjónÓ framleitt dagatalskubb í rúman áratug og hefur skapast sterk hefð fyrir kubbnum en útlit hans hefur verið eins frá byrjun. Þá framleiðir prentsmiðjan mánaðartöl, borðalmanök og umhverfisvænan jólapappír sem ber Svansmerkið. Prentsmiðjan Hjá GuðjónÓ var fyrsta umhverfisvæna prentsmiðjan á Íslandi árið 2000 og hlaut þá Svansvottun. Um 90% af pappírnum sem er notaður er Svansvottaður og kemur það vel út í stafrænu prentuninni, sem nú hefur verið tekin upp. Aðrar breytingar á umhverfissviðinu eru t.d. þær, að nú er hætt að nota filmur við plötugerð og framkalla prentplötur í vökva, sem var mjög hættulegur. Í staðinn eru prentplöturnar ‘laserbrenndar’ stafrænt án allra spilliefna.
Guðmundur R. Guðmundsson.
Ingibjörg S. Ingjaldsdóttir.
Prentmet
Reykjavík 1992–2019
Hjónin Guðmundur Ragnar Guðmundsson (1967–) prentsmiður og rekstrarfræðingur og Ingibjörg Steinunn Ingjaldsdóttir (1968–) rekstrarfræðingur stofnuðu prentsmiðjuna Prentmet í apríl 1992. Fyrirtækið var þá í 50 fm leiguhúsnæði að Suðurlandsbraut 50 og var þar til 1999. Ný prentvél var keypt 1995 og staðsett í Skeifunni 6 og sama ár voru keyptar tvær litlar prentsmiðjur, G.Ó. prent (Guðmundar Óskarssonar) og Prentverk Skapta Ólafssonar og þeir urðu síðan báðir starfsmenn Prentmets.
Haustið 1999 keypti Prentmet 510 fm húsnæði í Skeifunni 6 og flutti þangað alla starfsemi sína í febrúar árið 2000. Í lok desember árið 2000 keypti Prentmet Prentberg í Kópavogi og Prentverk Akraness, sem heitir nú Prentmet Vesturlands. Í janúar 2001 var Fjölritunarstofa Daníels Halldórssonar keypt, bæði rekstur og húsnæði, en hún var á sömu hæð og Prentmet, stofnuð 1927 og elsta fjölritunarstofa landsins.
Eigið húsnæði var nú orðið 1300 fm og í desember 2002 voru starfsmenn orðnir um 50 talsins. Í mars það ár var Íslenska prentsmiðjan keypt og starfsemi hennar flutt í Skeifuna 6. Í desember keypti Prentmet 3800 fm húsnæði af DeCode að Lynghálsi 1 og var flutt í nýja húsnæðið rétt fyrir jól 2002.
Í febrúar árið 2003 keypti Prentmet Félagsbókbandið-Bókfell og nýjar vélar voru keyptar það ár fyrir umbúðagerð og prentun á þær. Prentsmiðja Suðurlands var síðan keypt árið 2006 og heitir nú Prentmet Suðurlands. Árið 2007 keypti svo Prentmet rekstur Prentsmiðju Hafnarfjarðar ehf. Öll fyrirtækin sem Prentmet hefur keypt undanfarin ár eru nú komin undir nafn Prentmets.
Prentmetsskólinn var stofnaður í september 2005. Markmið hans er að upplýsa starfsmenn Prentmets um starfsemi í öllum deildum fyrirtækisins, umhverfi, þjónustu og framleiðslu og að þeir geti orðið almennt góðir í að kynna fyrirtækið. Prentmet í Reykjavík hlaut Svansvottun — Norræna umhverfismerkisins í júlí 2011, Prentmet Suðurlands í september sama ár og Prentmet Vesturlands í nóvember 2012.
Árið 2019, 20. mars, birtist á heimasíðu Prentmets að það hefði keypt alla prentvinnslu Odda ásamt tækjum. Kaupin voru gerð með fyrirvara um samþykki samkeppnisyfirvalda. 20. nóvember voru kaupin samþykkt af SKE. Nýtt nafn er Prentmet Oddi og starfsmenn eru rúmlega 100 talsins.
Ragnar Þ. Guðmundsson.
Guðmundur Kristjánsson.
Steindór Hálfdánarson.
Gutenberg
Reykjavík 2002–2008
Steindórsprent-Gutenberg 1992–2002
Steindórsprent og Prentsmiðjan Gutenberg voru bæði gamalgróin prentfyrirtæki þegar þau sameinuðust 1992. Steindórsprent var stofnað 1934 og var til húsa í Miðbænum í Reykjavík, lengst af í Tjarnargötu 4, en flutti seinna inn í Múlahverfi í Ármúla 5. Prentsmiðjan Gutenberg var hins vegar enn eldri, stofnuð 1904 af forvígismönnum prentara í lok mikillar vinnudeilu um aldamótin. Þá reistu þeir gamla prentsmiðjuhúsið í Þingholtsstræti 6 og þar var prentsmiðjan allar götur síðan til 1974–75.
Það var upp úr annarri mikilli vinnudeilu 1971, að ríkissjóður sem hafði keypt prentsmiðjuna 1930 þótti ástæða til að endurnýja húsnæði sitt.* Þá keypti hann húseignir Prentsmiðju Jóns Helgasonar og Félagsbókbandsins í Síðumúla 16. Ragnar Þ. Guðmundsson (1921–1984) setjari var prentsmiðjustjóri á þessum tíma. Flutt var endanlega inn í nýja staðinn í október 1975 í 2000 fm húsnæði. Ríkisprentsmiðjan var síðan gerð að hlutafélagi 1991 og seld Steindórsprenti sem áður sagði 1992. Eftir lát Ragnars tók Guðmundur Kristjánsson (1944–) við sem prentsmiðjustjóri. Árið 1994 var Prentsmiðja Árna Valdemarssonar sameinuð Steindórsprent-Gutenberg í húsnæðinu að Síðumúla 16.
Árið 2000 keypti Prentsmiðjan Oddi, Steindórsprent-Gutenberg og árið 2002 var Grafík sameinuð Steindórsprent-Gutenberg undir nafninu Gutenberg. Fyrirtækið var samt rekið áfram sem sjálfstæð eining til ársins 2008 en þá var starfsemi Gutenbergs sameinuð Prentsmiðjunni Odda undir nafni Odda.
*Magnús Kjartansson (1919-1981) sem var iðnaðarráðherra 1971 skipaði nefnd um Ríkisprentsmiðjuna Gutenberg 28. desember 1971 til að endurskoða rekstur hennar, miðað við að tryggja prentsmiðjunni húsakost, vélbúnað og aðra aðstöðu til að gegna sem best verkefnum sínum í þágu Alþingis, stjórnarráðsins og Háskóla Íslands. Þetta var m.a. eitt af því sem hafðist upp úr vinnudeilunni 1971, að bókagerðarmenn í Gutenberg fengu viðunandi húsnæði og betri vinnuaðstöðu eftir þessa samninga.
Arnór K. Guðmundsson.
Guðbjartur Á. Jónsson.
Prentbær
Hafnarfirði 1990–1998
Arnór Kristinn Guðmundsson (1950–) bókbindari og prentari og Guðbjartur Ásgeirsson Jónsson (1944–2002) prentari stofnuðu Prentbæ 1990.
Þetta var áður Prentsmiðja Friðriks Jóelssonar, sem var rekin í Hafnarfirði frá 1978–1989. Þá keypti Bókaútgáfan Iðunn (Jón Karlsson) prentsmiðjuna og rak hana í eitt ár, en þá var hún seld þeim félögum Arnóri og Guðbjarti og fékk nafnið Prentbær. Var hún til húsa að Dalshrauni 1 í fjögur ár, en síðan flutt í gamla Rafha-húsið við Lækjargötu og var rekin þar í önnur fjögur ár til ársins 1998.
Prentbær sameinaðist Prisma það ár og nefndist Prisma-Prentbær fram til ársins 2001, en varð þá gjaldþrota.
Svavar Ellertsson.
Emil Wilhelmsson.
Stapaprent
Reykjanesbæ 1984–
Stapaprent var stofnað 1984 af Svavari Ellertssyni (1956–) prentara. Það var fyrst til húsa að Brekkustíg 52 í Keflavík, en flutti nokkrum árum seinna að Brekkustíg 39. Árið 1990 kom Emil Wilhelmsson (1938–) prentari inn í fyrirtækið sem hluthafi, og var það starfrækt í Keflavík á sama stað og fyrr af þeim Svavari og Emil saman. Emil starfaði þar síðan í 20 ár. Um svipað leyti var skipt yfir í stafræna tækni og gamlar vélar voru seldar. Í fyrirtækinu er nú tölvusetning, Heidelberg prentvél og stór prentvél frá Solna, ennfremur öll venjuleg frágangstæki, svo sem brotvél og rafmagnsskurðarhnífur.
Stapaprent hefur nú starfað hátt í fjóra áratugi og prentar bækur, blöð og bæklinga, ennfremur fréttabréf og sálmaskrár og alls konar smáprent, en auk þess plaköt og myndir á striga. Á árunum 1995–1996 fjárfesti fyrirtækið í nýju húsnæði í Grófinni 13c í Keflavík.
Steingrímur Guðjónsson.
Prentsmiðjan Steinmark
Hafnarfirði 1982–
Prentsmiðjan Steinmark var stofnuð þann 1. janúar 1982 af Steingrími Guðjónssyni (1948–) offsetprentara og Markúsi Jóhannssyni (1951–) prentsmið, báðum úr Hafnarfirði. Steingrímur er lærður offsetprentari með meistararéttindi frá 1974, en Markús lærði prentmyndaljósmyndun og hann snéri sér að öðrum störfum eftir hálft ár.
Steinmark hefur verið til húsa að Dalshrauni 24 í Hafnarfirði allt frá byrjun. Nafn prentsmiðjunnar er þannig tilkomið að það er samsett af fyrri hluta nafna stofnendanna, en í annan stað vísar það til forsögu iðngreinarinnar. Steinmark er með 5 lita Roland prentvél og 2ja lita Heidelberg GTO og býður upp á alhliða prentþjónustu þ.e. alla forvinnslu, prentun og frágang.
