Sveinn R. Eyjólfsson.
Frjáls fjölmiðlun
Reykjavík 1981-2002
Frjáls fjölmiðlun var stofnuð árið 1981 utan um útgáfu dagblaðsins DV. Dagblaðið og Vísir áttu sinn helminginn hvort en Sveinn R. Eyjólfsson (1938–) var stjórnarformaður. Prentsmiðjan Hilmir hætti sem sérstök prentsmiðja 1983, eins og áður er getið, og rann saman við starfsemi Frjálsrar fjölmiðlunar. Fyrirtækið gaf því út nokkrar bækur, en þó aðallega kiljur og tímaritin Vikuna og Úrval, auk DV. Árið 1994 keypti Frjáls fjölmiðlun prentsmiðjurekstur Ísafoldarprentsmiðju og var hann sameinaður rekstri prentsmiðju Frjálsrar fjölmiðlunar að Þverholti 11.
Jafnframt voru keyptar húseignir Hampiðjunnar við Þverholt 9 og Brautarholt 1 og þangað var flutt með starfsemina. Á þessum árum eignaðist Frjáls fjölmiðlun leifar gömlu flokksblaðanna, Tímans, Alþýðublaðsins og Vikublaðsins (arftaka Þjóðviljans) auk Dags á Akureyri. Þau voru sameinuð í eitt dagblað, Dag-Tímann, sem ári seinna var breytt í Dag. Hann kom út til ársins 2001. Þá var ákveðið að hefja útgáfu nýs dagblaðs, Fréttablaðsins, sem dreift yrði ókeypis í hús á höfuðborgarsvæðinu. Þetta varð allt mjög kostnaðarsamt og gekk ekki upp. Frjáls fjölmiðlun varð síðan gjaldþrota árið 2002.
Upp úr þrotabúinu voru svo stofnuð tvö félög, annars vegar um útgáfu Fréttablaðsins og hins vegar um útgáfu dagblaðsins DV. Þá keyptu Kristþór Gunnarsson (1960–) og Kjartan Kjartansson (1955–) Ísafoldarprentsmiðju og var prentsmiðjan flutt suður í Garðabæ.
Kristján A. Helgason.
Prentsmiðjan Klif
Patreksfirði 1990–1993
Prentsmiðjan Klif á Patreksfirði var stofnuð 1990 þegar hjónin Kristján A. Helgason (1953–) prentari og kona hans Jóna S. Marvinsdóttir (1946–) keyptu Fjölritunarstofuna Barð á Patreksfirði af Kolbrúnu Pálsdóttur og Oddi Guðmundssyni. Barð var stofnuð af Rögnvaldi Bjarnasyni 1984, en hann seldi Kolbrúnu og Oddi reksturinn 1986.
Prentsmiðjan Klif var upphaflega prentþjónusta sem var keypt af Sæmundi Ágústssyni í Stensli, með Multilith 1850 stenslagerðarvél, nýjum skurðarhníf úr Borgarfelli og ýmsum öðrum tækjum.
Þá var hún til húsa að Hjöllum 2 á Patreksfirði, en eftir að Kristján og Jóna tóku við var starfsemin rekin í Stúkuhúsinu að Aðalstræti 50. Prentsmiðjan var lögð niður vorið 1993 og tæki og tól seld til Reykjavíkur.
Óskar Sampsted.
Edward G. Oliversson.
Björn H. Björnsson.
Prentberg
Kópavogi 1980–2000
Félagarnir og prentararnir Óskar Gunnar Sampsted (1930–2012), Edvard Gísli Oliversson (1934–) og Björn Helgi Björnsson (1932–2016) stofnuðu prentsmiðjuna Prentberg í Kópavogi þann 1. mars 1980. Þeir höfðu allir lært prentun á svipuðum tíma í Ísafoldarprentsmiðju og unnu svo saman hjá Arnbirni Kristinssyni í Setbergi í Reykjavík lengst af þess starfstíma. Þegar Arnbjörn hætti keyptu þeir mestan hluta af vélunum frá honum til hinnar nýju prentsmiðju sinnar. Óskar starfaði þar sem prentari og framkvæmdastjóri. Björn starfaði sem prentari, en Edvard var setjari.
Prentberg var síðasta prentsmiðjan á Stór-Reykjavíkursvæðinu þar sem hægt var að fá prentað bæði með nýju (offset) og gömlu aðferðinni (blýprentun) allt fram að síðustu aldamótum. Prentsmiðjan hætti árið 2000 og þá voru vélarnar seldar til Prentmets.
Friðrik Jóelsson.
Prentsmiðja Friðriks Jóelssonar
Hafnarfirði 1978–1989
Friðrik Jóelsson (1922–2013) prentari tók sveinspróf í prentun 1945. Hann stofnaði Prentsmiðju Friðriks Jóelssonar 1978 og rak hana að Reykjavíkurvegi 80 í Hafnarfirði fram til ársins 1989. Þá keypti Bókaútgáfan Iðunn (Jón Karlsson) prentsmiðjuna en hún var seld ári seinna til prentaranna Arnórs Guðmundssonar (1950–) og Guðbjarts Jónssonar (1944–2002) í Hafnarfirði sem stofnuðu prentsmiðjuna Prentbæ.
Bergsteinn Pálsson.
Kristján Karl Pálsson.
Helluprent
Hellu 1978–1982
Það voru bræðurnir Bergsteinn Pálsson (1939–) prentsmiður og Kristján Karl Pálsson (1933–2012) prentari sem voru helstu hvatamenn að stofnun prentsmiðjunnar Helluprents árið 1978.
Að þessu verkefni komu líka ýmsir heimamenn, t.d. hreppsnefndarmenn, Sigurður Óskarsson formaður verkalýðsfélagsins og fyrirtækið Tjaldborg, sem var fyrirferðarmikið á staðnum um þær mundir, rak meðal annars hótel fyrir utan það að sauma tjöld fyrir landsmenn.
Bergsteinn og Kristján lögðu til prentvélarnar, en þær komu úr prentsmiðju þeirra Víkurprenti, sem þeir ráku á árunum 1976–1978. Hellumenn höfðu haft þó nokkur viðskipti við Víkurprent og lögðu þess vegna mjög að þeim bræðrum að flytja sig austur á Hellu með prentsmiðjuna. Þeir slógu til og byrjuðu á því að byggja stórt prentsmiðjuhús á staðnum og fékk þá Helluprent lán hjá Byggðastofnun til framkvæmdanna. Þegar þeir voru fluttir inn varð Kristján Pálsson prentsmiðjustjóri.
Verkefni prentsmiðjunnar var aðallega bókaprentun, en reksturinn var alltaf mjög erfiður, meðal annars vegna fjarlægðar frá Reykjavík en flutningskostnaður var mikill. Þetta ævintýri endaði svo á því að árið 1981 keypti hreppurinn húsið og 1982 var starfseminni hætt.
Lárus Valberg.
Offsetfjölritun
Reykjavík 1977–2006
Offsetfjölritun var stofnuð árið 1977 af þremenningunum Lárusi Valberg (1951–), Leifi Aðalsteinssyni (1943–) og Gunnari Hámundarsyni (1940–2014) og var prentsmiðjan fyrst í bílskúr í Efstasundi 21 í Langholtshverfi í Reykjavík.
Lárus hafði unnið við prentvélaviðgerðir, Leifur var skriftvélavirki og Gunnar hafði unnið hjá Fjölritunarstofu Daníels Halldórssonar. Enginn þeirra var því lærður bókagerðarmaður, en tæknibreytingarnar voru örar á þessum tíma og stundum erfitt að gera kröfur um fagkunnáttu.
Ári seinna eða 1979 var flutt í Síðumúla 20 upp á 2. hæð en síðar var starfsemin flutt í Lágmúla 7, þar sem hún var í nokkur ár. Þá keyptu þeir Lárus og Leifur hlut Gunnars og fluttu fyrirtækið að Mjölnisholti 14. Árið 2003 keypti Lárus síðan hlut Leifs og var hann þá orðinn eini eigandi prentsmiðjunnar.
Á sama tíma og Kristján Ingi Einarsson í Leturprenti seldi tveimur starfsmönnum sínum, Burkna Aðalsteinssyni og Hálfdáni Gunnarssyni fyrirtækið árið 2006, keyptu þeir félagar fyrirtækið Offsetfjölritun af Lárusi Valberg. Offsetfjölritun hefur prentað mikið af námsefni fyrir ýmsa aðila á undanförnum árum.
Þórður H. Bergmann.
Sigurður Haraldsson.
Háskólaprent
Reykjavík 2009–
Háskólafjölritun 1976-1990 | Prentgarður / Háskólafjölritun 1990-1998 | Háskólafjölritun 1998-2009
Háskólafjölritun var stofnuð af stúdentum árið 1976. Það var þá til húsa í félagsheimili þeirra sem hét Félagsstofnun stúdenta og var við hliðina á Þjóðminjasafninu. Á þessum tíma voru notaðar litlar offsetvélar og prentað var með prentmótum úr plasti.
Fagmenn störfuðu ekki að neinu ráði í Háskólafjölritun fyrr en Þórður Helgi Bergmann (1945–) prentari fékk atvinnutilboð frá Félagsstofnun stúdenta árið 1988 og var hann ráðinn sem deildarstjóri Háskólafjölritunar. Þá voru vinstri menn (Röskva) við völd í Félagsstofnun og þeir vildu gera Háskólafjölritun að alvöru prentsmiðju. Þórður sá því um kaup á nýrri offsetprentvél og hann keypti einnig bókbandsvélar frá bókbandsstofunni Flatey. Þá var byrjað að prenta meira af bókum, blöðum og stærri verkefnum. Þórður var deildarstjóri til ársins 1989, en þá komust hægri menn (Vaka) til valda og þeir vildu ekki standa að svona rekstri eins og Röskva. Þá varð úr að Þórður og Félagsstofnun gerðu með sér samning og Þórður tók við rekstrinum og rak fyrirtækið á eigin vegum 1990–1997 og nefndist það þá Prentgarður/Háskólafjölritun.
Árið 1997 missti Þórður leigusamninginn og hann seldi fyrirtækið til Sigurðar Haraldssonar sem enn starfar þar ásamt Björgvini Ragnarssyni sem kom inn í fyrirtækið 2009 og starfar nú sem framkvæmdastjóri. Sigurður hélt nafninu Prentgarður/Háskólafjölritun í eitt ár, en kallaði það síðan aðeins seinna nafninu og hélst það til ársins 2009 að nafninu var breytt í Háskólaprent. Það er nú staðsett á Fálkagötu 2, á horninu á Fálkagötu og Suðurgötu (gengið inn Suðurgötumegin).
Háskólaprent er einkarekið fyrirtæki og hefur sérhæft sig í að þjónusta skólafólk, ásamt því að sinna allri almennri prentun fyrir almenning. Þar starfa nú þrír starfsmenn auk framkvæmdastjórans.
Háskólaprent var umhverfisvottað með Svansmerkinu árið 2010.
Guðmundur Kristjánsson.
Gústaf Símonarson.
Sveinn Gústafsson.
Prentsmiðjan Rún
Reykjavík 1963–1968 og 1976–1997
Prentsmiðjan Rún var fyrst starfrækt á árunum 1914–1917. Árið 1939 stofnaði svo Guðmundur Kristjánsson (1910–1946) prentsmiðju með þessu nafni en hún starfaði stutt eða til 1940. Guðmundur keypti þá hlut í Alþýðuprentsmiðjunni og gerðist forstjóri hennar til 1945. Þá stofnaði hann Prentverk Guðmundar Kristjánssonar, sem byrjaði að starfa 1946, en hann féll frá á sama ári. Prentsmiðjan hélt áfram starfsemi sinni undir hans nafni fram til ársins 1950. Þá var nafni hennar breytt í Prentsmiðjan Rún, en hún starfaði til ársins 1960.
Heimir Br. Jóhannsson (1930–) lærði prentun í Prentverki Guðmundar Kristjánssonar, en lauk náminu í Rún og vann þar í eitt ár eftir að hann tók sveinspróf. Hann átti hlut í prentsmiðjunni.
Gústaf Símonarson (1922–2017) prentari, vann þar líka og keypti hlut hans. Árið 1963 byrjaði hann síðan með litla prentsmiðju í húsi sínu að Nökkvavogi 3 sem hann nefndi Prentsmiðjuna Rún. Gústaf rak hana til ársins 1968 en þá keypti Hagprent vélarnar en Gústaf hélt nafninu.
Það var svo árið 1976 að sonur hans, Sveinn Gústafsson (1945–) endurreisti Prentsmiðjuna Rún með nýjum vélakosti og rak hana til ársins 1997. Þá hætti hún rekstri og var seld í pörtum.
Árni Mogens Björnsson.
Reynir H. Jóhannsson.
Prenthúsið
Reykjavík 1976–
Prentararnir Árni Mogens Björnsson (1946–) og Reynir Hlíðar Jóhannsson (1946–) stofnuðu prentsmiðjuna Prenthúsið í Reykjavík 1976. Það var þá til húsa að Barónsstíg 11, en þeir fluttu nokkru seinna að Höfðatúni 12, á 1. hæð, þar sem Prentsmiðjan Leiftur hafði verið áður. Næst var prentsmiðjan flutt í eigið húsnæði að Faxafeni 12 og var þar í nokkur ár.
Árið 1991 var fyrirtækinu skipt upp á milli Árna og Reynis, Árni rekur prentsmiðjuna en Reynir fékk útgáfuna í sinn hlut. Sama ár flutti Árni með prentsmiðjuna í Skúlatún 6 og þar var hún rekin í níu ár. Þá var flutt að Hverfisgötu 103 og árið 2013 í Skeifuna 9. Síðan árið 2015 hefur prentsmiðjan verið til húsa að heimili Árna að Grundargerði 19 í Reykjavík.
Það má geta þess til gamans að þau átta ár sem Prenthúsið gaf út bækurnar um Ísfólkið (1983–1991) voru prentuð um 350.000 eintök af þeim, svo vinsælar voru þessar sögur.
Bergsteinn Pálsson.
Kristján Karl Pálsson.
Víkurprent
Reykjavík 1976–1978
Á Langholtsvegi 109, þar sem Karlakórinn Fóstbræður hefur aðsetur, voru reknar tvær prentsmiðjur um tíma. Hin fyrri var prentsmiðja Olivers Steins Jóhannessonar bókaútgefanda, Prentsmiðjan Skuggsjá, en hin var Víkurprent, sem var rekin þar árin 1976–1978.
Bræðurnir Bergsteinn Pálsson (1939–) prentsmiður og Kristján Karl Pálsson (1933–2012) prentari keyptu prentsmiðjuna af Oliver Steini og kölluðu hana Víkurprent. Þeir ráku hana þarna til 1978 að bræðurnir fluttust austur að Hellu á Rangárvöllum með vélarnar og stofnsettu þar prentsmiðjuna Helluprent.
