Þorgrímur Einarsson.
Olav Hansen.
Endurprent
Reykjavík 1961–1994. ÞEGG 1954–1961
Þorgrímur Einarsson (1920–2007) offsetprentari og Guðmundur Guðjónsson stofnuðu prentsmiðju 1954 sem þeir nefndu ÞEGG, en frá árinu 1957 átti Þorgrímur fyrirtækið einn. Frá árinu 1961 var það kallað Endurprent. Olav Hansen (1920–1994) offsetprentari rak fyrirtækið með Þorgrími frá 1963–1967. Þá tók Olav við rekstrinum og rak það síðan einn til starfsloka.
Þorgrímur Einarsson var sonur Einars Þorgrímssonar, stofnanda Lithoprents, og hóf þar nám hjá föður sínum árið 1938.
Arnbjörn Kristinsson.
Setberg
Reykjavík 1960–1980
Arnbjörn Kristinsson (1925–2017) prentari sem stofnaði Bókaútgáfuna Setberg 1950 stofnaði einnig Prentsmiðjuna Setberg 1960. Hann var eigandi og framkvæmdastjóri frá upphafi og prentsmiðjustjóri frá 1960.
Arnbjörn lauk sveinsprófi í setningu í Ísafoldarprentsmiðju árið 1945, en stundaði síðan nám við Fagskolen for Boghåndværk í Kaupmannahöfn eftir prentnámið. Arnbjörn vann síðan í Gutenbergshus í Kaupmannahöfn í eitt ár, 1946–1947 og þar á eftir í Ísafoldarprentsmiðju áður en hann stofnaði bókaútgáfu og prentsmiðju.
Jón B. Hjálmarsson.
Prentsmiðja Jóns Helgasonar
Reykjavík 1960–1973
Jón B. Hjálmarsson (1927–1975) prentari og fleiri keyptu Prentsmiðju Jóns Helgasonar 1960 og ráku hana undir sama nafni og á sama stað í nokkur ár, en fluttu síðan í nýtt húsnæði að Síðumúla 16, þar sem prentsmiðjan var rekin undir sama nafni áfram. Árið 1973 keypti svo Ríkisprentsmiðjan Gutenberg prentsmiðjuna og húsnæðið í Síðumúla 16 og flutti þangað frá sínum gamla stað í Þingholtsstræti 6.
Hilmar A. Kristjánsson.
Axel Kristjánsson.
Prentsmiðjan Hilmir
Reykjavík 1959–1983
Hilmar A. Kristjánsson stofnaði Prentsmiðjuna Hilmi árið 1959. Nokkru áður hafði hann gerst formaður Svifflugfélags Íslands og var byrjaður að gefa út tímaritið Flugmál, sem gekk mjög vel. Hann hóf líka að gefa út Vikuna, sem brátt stækkaði og upplagið fór yfir 20 þúsund eintök. Vikan var prentuð í Steindórsprenti en þeir önnuðu þessu ekki því blaðsíðufjöldinn varð líka margfaldur. Hann ákvað því að stofna prentsmiðju og fékk eldgamla prentvél úr Félagsprentsmiðjunni, en setjaravél í Herbertsprenti, sem var að hætta um þetta leyti. Það var þó bundið því skilyrði að hann keypti alla prentsmiðjuna, sem hann og gerði.
Þetta gekk nú samt ekki þrautalaust fyrir sig, því honum var sagt að til þess að ná vélinni út úr húsinu í Bankastræti þyrfti að láta rífa hana í sundur. Þessu gat Hilmar ekki beðið eftir og ákvað að láta rífa þakið af húsinu og hífa vélina upp með krana frá Eimskip.
Þá hóf Hilmar að gefa út dagblaðið Mynd í ágúst árið 1962, en útgáfu þess var hætt fljótlega. Hilmar fór þá af landi brott (til S-Afríku), en faðir hans Axel Kristjánsson (1908–1979) í Rafha tók við stjórnartaumunum og var forstjóri Hilmis til starfsloka. Prentsmiðjan Hilmir var fyrst til húsa að Laugavegi 174, en var síðan flutt í Skipholt og seinna í Síðumúla. Árið 1983 hætti Hilmir sem sérstök prentsmiðja, en prentunin rann saman við starfsemi Frjálsrar fjölmiðlunar í Þverholti.
Magnús Vigfússon.
Svavar Magnússon.
Offsetmyndir
Reykjavík 1957–
Magnús Vigfússon (1929–2017) stofnaði prentsmiðjuna Offsetmyndir 1957 ásamt Þóri Hallgrímssyni (1925–1973). Þeir ráku prentsmiðjuna saman allt til dánardægurs Þóris, 19. janúar 1973. Fyrst voru þeir til húsa að Brávallagötu 16 í kjallara, en fluttu síðan 1965 í Mjölnisholt 14. Tveir synir Magnúsar lærðu þar hjá honum iðnina: Svavar Magnússon (1951–) sem er offsetprentari og hefur unnið þar frá árinu 1968 og Ingvi Magnússon (1959–) sem er offsetljósmyndari og vann þar frá árinu 1978–1988. Árið 2006 var fyrirtækið flutt að Stórhöfða 20, en þar var það til húsa allt til ársins 2017, að Svavar flutti það heim til sín að Neðstabergi 22. Þar hefur hann aðstöðu til að vinna í sínu fagi, en vinnur auk þess í Litróf að Vatnagörðum 14.
Haraldur H. Pétursson.
Klemenz Guðmundsson.
Prentsmiðja Suðurlands
Selfossi 1957–2006
Það voru prentararnir Haraldur Hafsteinn Pétursson (1933–2014) og Klemenz Guðmundsson (1934–) sem stofnuðu Prentsmiðju Suðurlands 1957. Haraldur Hafsteinn var prentsmiðjustjóri þar frá 1958, en Klemenz fluttist fljótlega til Noregs eftir að hún var stofnuð.
Fyrst var einungis um smáprentun að ræða en seinna var vélakostur aukinn og verkefni bættust við. Munaði þar mest um héraðsblöðin: Suðurland, Þjóðólf og Dagskrána, en einnig var nokkuð um bókaprentun. Árið 2006 keypti Prentmet Prentsmiðju Suðurlands og breyttist þá nafnið í Prentmet Suðurlands.
Prentsmiðjustjóri er Örn Grétarsson (1951–).
Sigurjón Þorbergsson.
Letur s/f
Reykjavík 1956–1990
Sigurjón Þorbergsson (1934–) stofnaði ásamt fleirum fjölritunarstofuna Letur s/f 1956. Starfsemi fjölritunarstofa á þessum tíma byggðist á stensilfjölritun, en seinna fengu þær offsetfjölritunarvélar. Letur var mjög vinsæl fjölritunarstofa meðal ungskálda á áttunda og níunda áratugnum og var meirihluti ljóðabóka gefin út á þennan hátt á þessum tíma. Letur var til húsa á ýmsum stöðum, m.a. á Grettisgötu og lengi á Hverfisgötu 50. Eitt stærsta verkefnið sem Letur prentaði var skattskráin og hefur Sigurjón unnið það verk allt frá árinu 1960 og til dagsins í dag eða meira en hálfa öld.
Guðjón Ó. Guðjónsson.
GuðjónÓ hf
Reykjavík 1955–1992
Prentsmiðja Guðjóns Ó. Guðjónssonar var smáprentsmiðja í Reykjavík, sem starfaði 1925–1927. Hún var síðan flutt til Vestmannaeyja en hluti hennar seldur. Eigandi hennar, Guðjón Ó. Guðjónsson (1901–1992) prentari, vann næstu árin í Ísafold og Herbertsprenti. Hann hóf bókaútgáfu 1921 og rak hana í rúm 50 ár. Guðjón stofnaði Prentstofu GuðjónÓ (síðar Prentsmiðju GuðjónÓ hf) 1955 og rak hana til 1985. Hrafnkell Ársælsson (1938–) var þar framkvæmdastjóri 1975–1985. Prentsmiðjan var síðan rekin áfram og Sigurður Nordal (1956–) tók við sem framkvæmdastjóri. Hann keypti Víkingsprent, Umslag og Prentsmiðjuna Viðey á árunum 1987–1990. Prentsmiðjan varð síðan gjaldþrota árið 1992, en þrír starfsmenn hennar stofnuðu þá prentsmiðjuna Hjá GuðjónÓ og starfar hún enn.
Einar Ingi Jónsson.
Kristján Ingi Einarsson.
Burkni Aðalsteinsson.
Hálfdán Gunnarsson.
Leturprent
Reykjavík 1954–
Einar Ingi Jónsson (1930–1987) prentari byrjaði 1952 að prenta í hjáverkum í bílskúr að Víðimel 63. Hann stofnaði síðan Leturprent 1953 að Ægisgötu 7, en byggði prentsmiðjuhús að Síðumúla 22 árið 1974. Einar rak prentsmiðjuna þar til 1985 að sonur hans Kristján Ingi (1952–) prentari og ljósmyndari tók við sem prentsmiðjustjóri og rak hana til ársins 2006. Þá keyptu tveir starfsmenn fyrirtækið, þeir Burkni Aðalsteinsson (1966–) prentsmiður og Hálfdán Gunnarsson (1976–) prentari. Samhliða keyptu þeir líka fyrirtækið Offsetfjölritun í Mjölnisholti 14.
Í dag er Leturprent til húsa að Dugguvogi 12 í húsnæði sem er um 600 fm að stærð. Burkni sinnir nú öðrum störfum, en starfsmenn eru 7 talsins: Hálfdán Gunnarsson er framkvæmdastjóri, Rögnvaldur Bjarnason (1960–) er framleiðslustjóri og aðrir starfsmenn eru: Svana Hansdóttir (1967–) fjármálastjóri, Jón Nóason (1953–) prentari, Kristbjörg Hermannsdóttir (1956–) bókbindari, Guðni Freyr Ingvason (1977–) prentari og prentsmiður og Daði Gunnlaugsson (1989–) aðstoðarmaður.
Leturprent býður upp á alla almenna prentun, hvort sem er stafræna eða offsetprentun. Þeir eru vel vélum búnir, m.a.: Heidelberg Di, Konica Minolta 1100 stafræn prentvél, Canon 1135 stafræn prentvél, Heidelberg GTO og tveir Heidelberg díglar, plotter, Bourgbinder fræsari, lamineringarvél og þrír Polar skurðarhnífar.
Kristinn Sigurjónsson.
Rafn Hafnfjörð.
Litbrá
Reykjavík 1954–2005
Stofnendur voru tveir ungir menn sem höfðu lært í Lithoprenti, annar var Kristinn Sigurjónsson (1923–1993) offsetljósmyndari, sá fyrsti hér á landi og hinn Rafn Hafnfjörð (1928–2011) offsetprentari. Þriðji stofnandinn var Eymundur Magnússon (1913–2009) prentmyndasmiður. Þeir byrjuðu á Nýlendugötu 14 en fluttu í eigið húsnæði 1963, Höfðatún 12, þar sem þeir byggðu með Gunnari Einarssyni sem átti prentsmiðjuna og bókaútgáfuna Leiftur.
Kristinn og Rafn keyptu hlut Eymundar 1960, en Rafn keypti hlut Kristins 1979 og rak hann fyrirtækið einn til ársins 2005.
