Þriðjudaginn 18. nóvember 2014 komu nokkrir áhugamenn um sögu og þróun prentverks á Íslandi saman í húsnæði Jóhanns Jónssonar við Eyrargötu og Búðarstíg á Eyrarbakka. Húsnæði þetta er um 3000 fermetrar að flatarmáli, að mestu á einni hæð og hýsti áður frystihúsið á staðnum en hefur verið nýtt sem geymsla síðustu ár. Hugmyndir Jóhanns um rekstur í húsnæðinu rúma meðal annars þá hugmynd að Prentsögusetur yrði þar í 400 fm plássi í tengslum við aðra starfsemi, svo sem veitinga- og gistiheimili og verkefnið Bókabæirnir austan fjalls, sem sveitarfélögin Árborg, Ölfus og Hveragerði eru aðilar að.

Hugmyndir að skipulagi húsnæðisins.

Þannig yrðu á staðnum kaffihús tengt prentun og bókum og einnig munir fyrir ferðamenn. Þá er vert að geta þess að Eyrarbakki tengist prentsögu landsins, þar sem prentsmiðja var stofnuð þar 1910 og þar voru prentuð bæði tímarit, blöð og bækur.

Hluti húsnæðisins mun verða tilbúinn til notkunar í apríl 2015, en Jóhann gerir ráð fyrir að öllum framkvæmdum verði lokið og húsið komið í rekstur eftir þrjú ár. Menn voru sammála um að safnið yrði að vera sjálfbært, þar sem ljóst væri að erfitt verði að fá fjárstyrki til langvarandi rekstrar þótt ýmsir aðilar myndu efalaust taka þátt í þeim kostnaði sem óhjákvæmilega legðist til við undirbúning, s.s. við flutning tækja í setrið. Þar voru nefnd til sögunnar samtök á borð við FBM, samtök bókaútgefenda, Iðnaðarráðuneytið, Samtök iðnaðarins, o.fl.